Një lajm i bujshëm po qarkullon në mediat e huaja, sipas të cilit thuhet se zyrtarët e inteligjencës amerikane, që janë të angazhuar në zhvillimet mjekësore në mbarë botën, morën informacione për një shpërthim epidemik të përhapur në Wuhan të Kinës, që në muajin nëntor të vitit të kaluar.
Mediat e huaja shkruajnë se zyrtarët e inteligjencës informuan Shtëpinë e Bardhë dhe zyrtarë të tjerë pranë qeverisë në lidhje me këtë informacion sekret.
Zyrtarët e inteligjencës më pas ia paraqitën informacionin Shërbimit Inteligjent të Mbrojtjes dhe stafit të përbashkët të Pentagonit, raportoi ABC News.
Këto paralajmërime parashikuan shpërthimin e koronavirusit, që ka bllokuar ekonominë globale dhe u ka marrë jetën më shumë se 12 mijë amerikanëve dhe mbi 80 mijë personave në të gjithë botën.
Ky informacion sekret u përfshi vetëm në dosjen "Daily Brief" të Presidentit, i cili është një dokument kyç i inteligjencës në fillim të janarit, pak ditë pasi Kina informoi zyrtarët globalë të shëndetit për shpërthimin e koronavirusit të ri.
Sipas raportit, burimet përshkruanin njoftime të përsëritura deri në dhjetor për politikanët dhe vendimmarrësit në të gjithë qeveritë federale në SHBA, si dhe Këshillin e Sigurisë Kombëtare në Shtëpinë e Bardhë.
Raporti u përpilua nga Qendra Kombëtare e Inteligjencës Mjekësore, e cila është pjesë e shërbimit të inteligjencës ushtarake të vendit, me zyra në Ft. Detrik, Maryland.
Këshilltari i tregtisë i Presidentit Donald Trump, Peter Navarro lëshoi paralajmërimin e tij të parë 'të zymtë' në një memorandum të datës 29 janar, vetëm disa ditë pasi u raportuan rastet e para të COVID-19 në SH.B.A.
Në atë kohë, Trump ishte duke e nënvlerësuar publikisht rrezikun që koronavirusi mund të paraqiste tek amerikanët. Megjithatë, disa javë më vonë ai pohoi se askush nuk mund ta parashikonte vazhdimësinë dramatike të përhapjes së koronavirusit.
Navarro lëshoi një memorandum të dytë rreth një muaj më vonë, më 23 shkurt, në të cilën ai paralajmëroi se sa dy milion amerikanë mund të vdisnin nga virusi.
Navarro paralajmëroi se 2 milion amerikanë mund të vdisnin dhe ekonomia mund të pësonte triliona dollarë dëme nëse nuk ndërmerren veprime.
Burimi: Daily Mail|Përktheu dhe Përshtati: JOQ Albania