Një nga viktimat e COVID-19 në Shqipëri është edhe Skënder Kurti, ish-boksier dhe trajner boksi. Prej ditësh i shtruar te infektivi, Skënderi nuk ia doli dot dhe dy ditë më parë u nda nga jeta.
Së fundmi, një nga boksierët që Kurti ka stërvitur, Kristian Demaj, ka folur për 'Report TV' duke kujtuar periudhën kur bashkëpunonin bashkë, madje tregon se çfarë i thoshte gjithmonë para se të futej në ring.
Demaj tregon:
Besim, kurajo, fitore fitore fitore, ka qenë kryefjala e tij. Fatkeqësisht u nda nga ne, nga jeta. I uroj ngushëllime familjes dhe të gjithë botës së sportit. Ishte një dhimbje e madhe, nuk gjej fjalë të përshkruaj dhimbjen për profesor Skënderin, Për të gjithë brezat do mbesë një motiv.
Më pas ai rrëfen edhe momentin kur mësoi lajmin si dhe bisedën që pati me të birin, teksa ky i fundit i ka treguar edhe fjalët e fundit të Skënderit.
Ai vazhdoi:
Lajmin e dëgjova nga mediat dhe komunikova me djalin e profesorit. Profesori ishte miku ynë. Komunikim kryesor e kam patur me djalin, me Renaton, që vazhdimisht përsëriste mësimin që na ka dhënë profesori. 'Babi thoshte do ta fitoj edhe këtë betejë'. Besimi ka qenë në maksimum që do ia dalë, por për fat të keq nuk ndodhi ashtu."