Edi Rama i kthen shpinën futbollit shqiptar: Klubet nuk do përfitojnë asgjë nga paketa financiare

Kryeministri u vendit, Edi Rama ka vendosur përfundimisht që t'i kthejë shpinën futbollit shqiptar në këtë kohë krize.

Rama ka deklaruar sot se klubet shqiptare nuk do të përfitojnë asgjë nga paketa financiare për gjendjen e koronavirusit.

Sipas tij, klubet e futbollit deklarojnë paga të rreme, sa një kompani fasonerie dhe për këtë arsye nuk duhet të ankohen.

Kryeministri tha:

Klubet e futbollit nuk kanë se çfarë i kërkojnë qeverisë dhe arkës së shtetit. Klubet e futbollit deklarojnë paga të rreme sikur janë kompani fasone. Klubet e futbollit le të shikojnë se çfarë bëjnë klubet e futbollit në vende të tjera dhe ti adaptohen kësaj lufte. Me gjithë respektin që kam për ta, por mendoj që nuk është koha për të ndihmuar klubet. Duke qenë se kanë deklaruar paga të rreme le të mos ankohen se nuk ka pikë lezeti.

Kujtojmë që thuajse të gjithë presidentët e klubeve shqiptare i kanë kërkuar ndihmë financiare qeverisë në këtë periudhë krize.

Madje presidenti i Skënderbeut, Ardjan Takaj, ironizoi duke thënë se kryeministri e ka mendjen fillimisht te Juventusi, skuadër për të cilën bën tifo dhe nuk e vret mendjen për futbollin shqiptar.