Ka shkuar në 400 numri i të infektuarve nga koronavirusi në Itali.
Vetëm gjatë 24 orëve të fundit, autoritetet italiane kanë konfirmuar 80 raste të reja të prekur nga virusi vdekjeprurës kinez.
Zonat më të prekura vijojnë të jenë Lombardia dhe Veneto.
Deri më tani, koronavirusi u ka marrë jetën 12 personave në Itali.
Qeveria italiane ka siguruar qytetarët e saj se janë ndërmarrë hapa për të parandaluar përhapjen e mëtejshme të virusit.
Senati italian miratoi dekretin për shpalljen e gjendjes së emergjencës në vend për shkak të koronavirusit, i cili u votua me 462 vota pro dhe vetëm 2 kundër.
Shumë universitete, kinema, pishina janë mbyllur dhe janë anuluar disa ngjarje publike, përfshi këtu edhe disa ndeshje të Serisë A.
Virusi kinez është përhapur në 11 qytete të Italisë, ndërsa rreth 55,000 persona janë vendosur në karantina.
Ekziston frika se shpërthimi i koronavirusit mund ta çojë Italinë në recesion ekonomik.
Mark Lowen i BBC-së thotë se në Milano kafenetë janë bosh për shkak të koronavirusit dhe shumë turistë kanë anuluar ardhjen e tyre.
Kujtojmë këtu se OBSH pranoi për herë të parë se rastet e reja me koronavirus kanë rritje më të lartë në Europë sesa në Kinë.
Dy ditët e fundit, listës së vendeve të prekura nga koronavirusi iu shtua edhe Zvicra, Austria, Kroacia, Greqia, Norvegjia, Gjeorgjia dhe Maqedonia e Veriut.
Në nivel global, janë raportuar mbi 80 mijë njerëz të infektuar me koronavirus, pjesa më e madhe e të cilëve gjendet në Kinë.
Burimi: BBC|Përktheu dhe Përshtati: JOQ Albania