Erdhi në vitin 2013 si “antidod” i korrupsionit, keqqeverisjes dhe rikthyes i shpresës, por shpejt u kthye në virusin që vret ngadalë, si një “armë biologjike” që në fillim të shkatërron sistemin nervor, të mpak gradualisht edhe fizikun dhe në fund të merr jetën, shkruan boldnews.al.
Jemi shtatë vite me këtë virus që e ka lënë vendin në varfëri, mbushur me korrupsion dhe drogë, riciklim të krimit duke zbrazur burgjet e Europës dhe dhënë mundësinë trafikantëve të qenieve njerëzore dhe drogës që të kapin pushtetin; deputetllëkun, kryabashkiakun, drejtorin në institucione të rëndësishme dhe të lidhur drejtëpërdrejtë me qeverinë e cila nga “virus i thjesht” kaloi në ndryshime të komplikuara ose mutacione, sidomos nga ndikimi i propagandës.
E vetmja “vaksinë” ishin zgjedhjet e lira dhe ndershme, por kurrë nuk u injektua, kur banda të ardhura nga bota e krimit u ulën këmbëkryq me pushtetin, u dhanë votat dhe morën benefite në tendera publik, aleshverishe dhe ndikim në tjetërsim prone. Administratën e lartë shtetërore e mbushi me Rilindas, një specie gjenetikisht e modifikuar, një miksim mes harbutërisë, dallaveraxhiut dhe kleptomani të pashërueshëm. Vrau konkurrencën dhe kjo qe goditja e madhe që pasoi me uzurpimin e çdo institucioni të pavarur, duke e kontrolluar në një dorë nga Kryevirusi…
Sot po vriten edhe fizikisht. Shumë hallexhi dergjen nëpër burgje se nuk paguan energjinë elektrike nga pamundësia ekonomike dhe kur tentuan të lidhin ato dy tela për të sjellë dritë për fëmijët, policia u vendosi prangat. Disa i dhanë fund jetës në burg, të tjerë kanë kaluar në depresion si shkak i varfërisë dhe problemeve të tjera sociale duke i dhënë fund jetës nga skamja.
Faza e dytë ishte edhe më e rëndë. Virusi qeveritar, vrau shpresën… Mbi 400 mijë persona kryesisht të rinj dhe fëmijë janë larguar jashtë vendit. Një pjesë kanë ikur me dokumentacione të rregullta, duke siguruar kontrata pune, por shumë të tjerë, që janë edhe shtresa më në nevojë, u larguan në kërkim të azilit në një nga vendet e BE-së, ku rekord mbajnë Gjermania, Franca dhe Belgjika.
Ka edhe më keq, ku edhe vendet e zhvilluara të BE-së u vunë në vështirësi para këtij “koronavirusi qeveritar” të Shqipërisë, sidomos në përhapjen e nismave të rrezikshme siç ishte ajo e “korrigjimit të kufijve” Kosovë-Serbi, me dirigjimin e “Ramvirus” dhe të “Minishengenit Ballkanik”. Europa nuk e qasi nga frika e “infektimit” duke refuzuar për tre vite rresht hapjen e negociatave.
Pasojat ranë mbi qytetarët, që sot të mbushur me propaganda, e injektuar deri në palcë rendin të blejnë maska nëpër farmaci për të “frenuar” koronavirusin, ndonëse jetën po ua merr ngadalë epidemia pushtet. Për ta larguar nuk nevojitet vaksinë me grup të madh shkencëtarësh bilogë, por masivitet qytetar në kërkim të të drejtave që jo vetëm u janë mohuar, por po përdhosen edhe nga agresiviteti dhe arroganca e qeverisjes e cila tashmë nuk po kontrollon as veten për shkak të mutacionit që ka pësuar në shtatë vite.
