Kanë dalë përgjigjet e testit të analizave laboratorike për tre persona të dyshuar me koronavirus në Kosovë.
Sipas Institutit Kombëtar të Shëndetësisë Publike të Kosovës (IKSHPK), rezultatet për të dyshuarit kanë dalë negative.
Njoftimi i IKSHPK:
Instituti Kombëtar i Shëndetësisë Publike i Kosovës (IKSHPK) gjatë ditës së sotme, më 25 shkurt 2020, ka marrë informatë nga Klinika Infektive e QKUK për tre raste të dyshimta në Koronavirus COVID-19. Pacientët u kontrolluan nga ekipi i infektologëve në Klinikën Infektive në QKUK dhe iu morën mostrat për testim laboratorik në virusin SARS-CoV-2 dhe Influenza A dhe B. Ekipi i Laboratorit të Mikrobiologjisë Molekulare në IKSHPK ka bërë testimin në virusin SARS CoV-2 dhe në influencë A dhe B me metodën rRT-PCR të të tre pacientëve. Testet kanë rezultuar negative për të tri analizat, domethënë të tre pacientët nuk janë të infektuar me virusin SARS-CoV-2 as me Influencë A dhe B.
Tre rastet e dyshuara për koronavirus u paraqitën sot në Klinikën Infektifve të QKUK. Ata kishin ardhur nga Italia.
Bëhet fjalë për një shtetas jo-kosovar 69-vjeçar , i cili kishte ardhur nga Italia dhe dy shtetas kosovarë, 23 dhe 25-vjeç, të cilët ishin kthyer nga shteti italian sot.
Autoritetet kosovare kanë njoftuar se janë përforcuar masat për monitorimin dhe parandalimin e rrezikut të përhapjes së koronavirusit.
