Një hotel në Tenerife në Ishujt Kanarie të Spanjës është mbyllur pasi një mjek Italian i cili ndodhej me pushime rezultoi pozitiv ndaj testit të koronavirusit.
Qindra pushuesve në Hotelin ‘H10 Costa Adeje Palace’ iu kërkua fillimisht të qëndronin në dhomat e tyre deri në momentin kur edhe do përfundonte vizita mjekësore ndaj të gjithëve, raportojnë mediat spanjolle.
Mjeku raportohet se është nga rajoni i Lombardisë, ku autoritetet italiane po luftojnë me një shpërthim momental të kësaj epidemie.
Rastet globale të evidentuara me koronavirus kanë kaluar 80,000 dhe shumica dërrmuese ndodhen në Kinë.
Organizata Botërore e Shëndetit (OBSH) tha të hënën se bota duhet të bëjë më shumë për t'u përgatitur për një pandemi të mundshme, një situatë kur një sëmundje infektive përhapet lehtësisht midis njerëzve në shumë vende.
Përqindja e personave të infektuar që vdesin duket të jetë midis 1% dhe 2%, megjithëse OBSH paralajmëron se shkalla e saktë e vdekshmërisë nuk dihet ende.
Informacioni më i fundit nga hoteli në Tenerife:
Gazeta El Pais citoi burime të policisë se autoritetet shëndetësore kishin urdhëruar monitorimin e pushuesve në hotelin në jug-perëndim të ishullit.
Një pushues në Facebook postoi sot një imazh të një shënimi të vendosur nën dyert e dhomës së tyre ku shkruhej:
Me keqardhje ju informojmë se për arsye shëndetësore, hoteli është mbyllur. Deri sa autoritetet sanitare të njoftojnë, ju duhet të qëndroni në dhoma".
Forcat e sigurisë po ndalojnë njerëzit të largohen nga hoteli, raportojnë mediat spanjolle.
Doktori, i cili kishte qëndruar në hotel me gruan e tij, testoi pozitiv dje dhe u vendos në izolim në Spitalin Universitar Nuestra Senora de Candelaria.
Ai do t’i nënshtrohet një testi të dytë për të konfirmuar virusin.
Burimi: BBC Përshtati dhe Përktheu: JOQ Albania