Fondi Shqiptar i Zhvillimit është një prej institucioneve kryesore që merret me përmirësimin e infrastrukturës rrugore në Shqipëri. Duke qenë se merret me rrugët, FSHZH-ja bën shumë tendera për rikonstruksionin e rrugëve të ndryshme.
Një ndër këto tendera është edhe ai me objekt “Rikonstruksion rruge Unaza Lumalas – Melçan – Porodinë, Bashkia Korçë”, dhe që do t’i kushtojë buxhetit të shtetit plot 450 milionë lekë. Kompania fituese për të kryer punimet është shpallur “Almo Konstruksion”.
Por ajo çfarë të bën përshtypje është fakti se në specifikimet e tenderit thuhet se gjatësia e kësaj rruge është vetëm 3.6 km.
Pra për 3.6 km rrugë do të harxhohen 450 milionë lekë, ku mesatarisht i bie 100 milionë lekë për 1 km rrugë.
Lind pyetja se me çfare do e shtrojë kjo kompani rrugën? Me zift apo me flori?
Pasi edhe sikur ta rikonstruktonte sipas të gjitha standardeve ndërkombëtare, një rrugë me gjatësi vetëm prej 3.6 km nuk mund të kushtojë aq shumë.
Por mesa duket drejtori i FSHZH-së, Dritan Agolli i ka marrë mirë mësimet nga kryeministri Rama sesi t’i bëjë tenderat për rrugët, pasi kur Rama ishte në krye të Bashkisë së Tiranës, Agolli ishte një nga vartësit e tij.
Ndërsa kompania “ Almo Konstruksion” e cila është nën pronësi të Shaban Bitrit dhe dy djemvë të tij Edmond dhe Alfons Bitri, nuk është ndonjë kompani e panjohur përsa i përket fitimit të parave nga buxheti i shtetit.
Sipas Thesarit, kjo kompani ka përfituar nga buxheti i shtetit për 4 vitet e fundit rreth 7 miliardë lekë.