Shumë bashki kanë hapur tendera për të bërë punime dhe rikonstruksion rrugësh në qytetet e tyre kryesore.
Edhe pse jemi në vitin 2020, shumë qytete kanë një infrastrukturë rrugore që lë shumë për të dëshiruar, pavarësisht se çdo vit hidhen miliona lekë për mirëmbajtjen e tyre apo për t’i rregulluar rrugët.
Një prej bashkive që ka vendosur të shpenzojë para për rikonstruksionin e rrugëve është edhe Bashkia Devoll e cila ka hapur një tender me objekt zgjerimin dhe rikonstruksionin e disa rrugëve. Ky tender ka një fond limit prej 833 milionë lekësh, i cili do të ndahet në 3 pjesë për 3 vitet e ardhshme deri në 2022. Për vitin 2020, fondi do të jetë 80 milionë lekë, për vitin 2021 do të jetë 333 milionë lekë, ndërsa për vitin 2022 kur do të mbyllen edhe këto punime, fondi limit i vënë në dispozicion do të jetë 586 milionë lekë.
Zona ku do të ndërhyhet i përket pjesës perëndimore të qytetit të Bilishtit, e cila është qendra e Bashkisë së Devollit e cila drejtohet nga Eduard Duro. Projekti në fjalë konsiston në zgjerimin e rrugës Vendore, Aks Superstrada e Devollit- Ismail Qemali, Demir Progeri-Aks Rrugor Etem Osman Xhaci, si dhe dhe gjithashtu rikonstruksionin e Rrugëve Vendore Lagje Nr. 2 dhe Lagje Nr. 3, në të cilën përfshihen 7 akse në total.
Rrugët e lagjeve Nr.2 dhe Nr.3 aktualisht janë të paasfaltuara. Mirëmbajtja nga ana e Bashkisë nuk ka munguar, duke u sistemuar herë pas here akset përbërëse të tyre, por është e nevojshme një ndërhyrje përfundimtare për të rehabilituar të gjitha rrugicat e lagjeve. Përjashtim këtu përben Aksi 7, i cili është pjesë e rrugës nacionale Korçë- Bilisht. Ky aks është në gjendje shumë të mirë nga pikëpamja inxhinierie, por është menduar zgjerimi anësor i tij me një korsi parkimi, duke parë fluksin e madh të makinave dhe qarkullimin e madh të tyre në këtë zonë, thuhet në detajet e tenderit.
Punimet përfshijnë gërmime dhe mbushje për krijimin e trupit të rrugëve, kanaleve kulluese anësore, akset, sinjalistikat rrugore, kalimet dhe pjerrësitë, etj.
