Kryebashkiaku Erion Veliaj vazhdon të pasurojë kompanitë e miqve të tij duke iu dhënë tendera për punë të ndryshme në Tiranë.
Një prej këtyre kompanive është edhe “SON Engineering & Construction”. Denoncimi për këtë kompani ka ardhur nga një qytetar i Tiranës, i cili shkruan se pas kësaj fshihet një shok i Veliajt dhe se projektet bëhen përpara se të dalin tenderat nga Bashkia.
“Si ka mundësi që tenderat e Bashkisë i merr vetëm SON ( shoku i Erion Veliajt, dhe pjesë e pagesës shkon direkt në xhepat e tij), ai është gjithnjë pas tenderave që fiton studio dhe projektet bëhen që përpara se të dalin tenderat në bashki”, shkruan qytetari.
Sipas kërkimeve tona kjo kompani ka fituar 4 tendera nga Bashkia e Tiranës për të bërë projektin e disa punëve publike në Tiranë, ku më i fundit është ai për projektimin e zyrave të reja të UKT-së.
Ndërsa tenderi me shifrën më të lartë është për një projektim për “Rikonceptim të Kopshtit Zoologjik’ nga e cila kjo kompani ka përfituar 220 milionë lekë.
Kjo kompani e cila ka si aksioner kryesor Erind Bejlerin ka përfituar gjatë 4 viteve të fundit nga buxheti i shtetit, rreth 450 milionë lekë.
Një fakt që bie në sy është se të katërta këto tendera, Bejleri i ka fituar në bashkëpunim me “A & E ENGINEERING sh.p.k”, e cila ka si aksionere kryesore Entela Çanon.
Nëse kompania e Bejlerit kishte fituar vetëm 4 tendera, kompania e Çanos ka fituar 32 tendera për projekte të ndryshme.
Ndërsa sipas Thesarit kjo kompani ka përfituar nga buxheti i shtetit 2 miliardë lekë.
Entela Çanos në vitin 2014 iu bë një atentat me ekpsloziv në makinë, por fatmirësisht ajo arriti të shpëtonte.