Vit i ri, avaz i vjetër. Bashkia e Tiranës e ka nisur 2020-ën me dhënien një tenderi me shifra mjaft të majme, plot 1.2 miliardë lekë për mirëmbajtjen e Sheshit Skënderbej. Por kush është fituesi i këtij tenderi? E kush tjetër përveç se “Fusha SHPK” mund ta fitonte këtë tender, pasi dihet lidhja e ngushtë që Erion Veliaj ka me pronarin e kësaj kompanie.
Të gjitha tenderët që kanë të bëjnë me rikualifikimin e sheshit Skënderbej i janë dhënë Shkëlqim Fushës. Por kësaj herë, Fusha nuk do e marrë të gjithë ‘Jackpotin’ për vete, pasi tenderin e ka fituar në bashkëpunim më kompaninë “Pastrime Silvio Shpk”.
Fituesi i këtij tenderi është shpallur në fillim të janarit dhe kontrata do të jetë funksionale për 3 vite.
Përveç shifrës së majme që ka ky tender, një tjetër fakt që vërehet është së në këtë tender nuk pasur asnjë garues tjetër përveç Fushës, çka tregon se ky tender ishte i paravendosur dhe kompanitë e tjera nuk kanë dashur të humbin kohën me plotësimin e dokumenteve, pasi fituesin e kanë ditur që kur është shpallur gara.
Por një tjetër fakt interesant është se Agjencia e Prokurimit Publik në njoftimin e saj ka nxjerrë si fitues vetëm kompaninë “ Pastrime Silvio shpk”, por kur hyn në dokumentet e tenderit shikohet se kjo kompani nuk e ka fituar e vetme.
Lidhja e ngushtë midis Veliajt dhe Fushës vazhdon të jetë e fortë, sidomos kur bëhet fjalë për tenderat që kanë të bëjnë me Sheshin Skënderbej.
Tabela e mëposhtme e tregon mjaft qartë, sesa para ka fituar Fusha në disa prej projekteve më të mëdha që janë zhvilluar nga Bashkia e Tiranës në vitet e fundit. Plot 38 miliardë lekë ka fituar Fusha në Bashkinë e Tiranës me në krye Erion Veliaj.
Ardhja në krye të bashkisë së Tiranës e Veliajt ka qenë si një telebingo për Shkëlqim Fushën, i cili gjithashtu po pret të bëjë një tjetër “Jackpot” me ndërtimin e teatrit të ri.
Tani që SPAK-u është ngritur pritet të shihet nëse do të merren në hetim kontratat e firmosura nga Veliaj me Fushën, pasi shifrat e këtyre kontratave i kalojnë shifrat reale që mund të kenë këto tendera. Mjafton të kujtojmë që vetëm rehabilitimi i Bulevardit “Zogu i Parë”, do të kushtojë 700 milionë lekë.