Rreth një vit më parë, qeveria përmes një deklarate së përbashkët të tre ministrive, urdhëroi ndalimin e hedhjes në treg dhe përdorimit të lëndëve piroteknike (fishekzjarret, shashkat, kapsollat) nga qytetarët.
Mirëpo, duket se ky urdhër i qeverisë është shkelur me të dyja këmbët, pasi në shumë qytete ka raportime se gjatë ditëve të fundit ka patur shitje të lëndëve të rrezikshme piroteknike, si dhe shpërthime të herë pas hershme të tyre.
Së fundmi, teksa na ndajnë vetëm pak orë nga ndërrimi i viteve, një incident i rëndë ka ndodhur në qytetin e Librazhdit.
Mësohet se një fëmijë 10-vjeçar ka mbetur i plagosur rëndë nga shpërthimi i fuqishëm i një kapsolle, pranë gjimnazit të qytetit.
Raportohet se i mituri ka marrë dëmtime të rënda në duar, bark dhe fytyrë. Ai është transportuar drejt Spitalit të Traumës në Tiranë për mjekim më të specializuar, pasi gjendja e tij shëndetësore paraqitet e rëndë.
Burime bëjnë me dije se 10-vjeçari është djali i drejtorit të OSHEE-së për Librazhdin, Behar Terziu.
Policia ka mbërritur në vendin e ngjarjes dhe ka nisur hetimet për zbulimin e rrethanave.