Teksa na ndajnë vetëm pak orë nga festa e Ndërrimit të Viteve, e cila kremtohet në të gjithë botën, të gjithë mezi presin ardhjen e vitit të ri, veçanërisht fëmijët.
Viti i Ri pritet me fizhekzjarre, festë dhe puthje në mesnatë, gjë e cila është traditë në shumë vende të botës, përfshirë edhe vendin tonë.
Mirëpo, shqiptarët për këtë festë kanë disa tradita, që i dallojnë nga të tjerët.
Nga gjeli i detit tek personi i parë që hyn në shtëpi, më poshtë gjeni të listuara disa nga supersticionet e shqiptarëve për festën e Ndërrimit të Viteve.
Pastrimi i shtëpisë me themel Pak ditë para Vitit të Ri shqiptarët u futen punëve me rrënjë duke pastruar gjithçka, duke filluar nga perdet, tapeti e deri te kolltukët. Edhe nëse diçka është e pastër, do pastrohet sërish! Këto njihen si “punët e Vitit të Ri” dhe bëhen që viti që vjen ta gjejë shtëpinë të pastër dhe të rregullt.
Tryeza mbushet plot me ushqime dhe s’duhet të mungojë gjeli i detit Në familjet shqiptare, atë natë është shumë e rëndësishme që tavolina të jetë plot. Nuk duhet të mungojnë llojet e ndryshme të ushqimeve, ëmbëlsirave, pijeve dhe shumë, po shumë mish. Viti i Ri duhet ta gjejë tavolinën të mbushur plot. Ah, kurrsesi mos harroni gjelin e detit, përsheshin dhe sallatën ruse. Pa to, Viti i Ri nuk ka kuptim.
Dollitë e vazhdueshme Nata e Vitit të Ri është nata e dollive. Fjala “gëzuar” dëgjohet më shpesh se çdo fjalë tjetër.
Byreku me lek Një tjetër traditë shqiptare është gatimi i byrekut me një lek brenda. Kujt i bie leku është personi që do ketë më shumë fat në vitin që vjen.
Ëmbësira karakteristike, bakllavaja Ëmbëlsira tipike e Vitit të Ri është pa dyshim bakllavaja dhe nuk ka as kadaif e asnjë lloj ëmbëlsire tjetër që mund t’ia marrë vendin. Bakllavaja përgatitet shumë ditë para dhe qërasen të gjithë mysafirët që vijnë në shtëpi.
Mesazhet e urimit Në datën 31 gjatë gjithë ditës, por më shumë në darkë, nuk mungojnë kurrë mesazhet e urimit. Madje, më para ishin aq të përhapur, saqë linjat telefonike bllokoheshin dhe mesazhi mund të të vinte të nesërmen.
Kush do të hyjë i pari në shtëpi në mëngjesin e 1 janarit? Është e rëndësishme që në shtëpi i pari të hyjë një fëmijë i vogël, mundësisht djalë. Po ashtu, ai që hyn i pari duhet të hyjë me këmbën e djathtë për të sjellë sa më shumë mbarësi.
