Kryeministri në largim i Kosovës, Ramush Haradinaj ka reaguar sërish për sulmet që i bëri pak ditë më parë homologu i tij shqiptar, Edi Rama, në prani të presidentit serb, Aleksandër Vuçiç, gjatë takimit të tretë të të ashtuquajturit "Samiti i Minishengenit Ballkanik".
Në një intervistë për mediat kosovare, Haradinaj theksoi se është ndodhur përballë një rreziku të madh dhe se nuk ka gjë personale me Ramën.
Ai deklaroi se dyshja Rama-Vuçiç donin ta ndanin Kosovën, ku një pjesë e saj do i bashkohej territorit të Shqipërisë, ndërsa pjesa tjetër Serbisë.
"Një lodër mashtruese", kështu e cilëson Haradinaj të ashtuquajturin "Minishengeni Ballkanik".
Ai tha:
Unë s’kam e nuk e bëj kurrgjë në baza personale. Jam ndodhur para një rreziku të madh që Kosova të ndahej në emër që gjoja ajo pjesë që mbetej të bashkohej me Shqipërinë. Unë jam detyruar të dal kundër. Interesi kombëtar, territori, sovraniteti ynë, ka qenë çështja e vendosjes së taksës, është nënshtrim, nuk mundesh t’i imponosh asgjë Serbisë, e pastaj pse me të na njohë ndonjëherë Serbia. Heqja e taksës, presionet që janë bërë, kur dilnin dhe thoshin që “duhet me u heq taksa, minishengeni është veç një formulë. “Ne nuk jemi Amerika” më thonë mua, por ky minishengeni është bërë me e fut Kosovën në atë klub. Ata nuk e kanë atë lodrën që patën qef me lujt me të. Është një lodër mashtruese edhe për Vuciçin edhe për Edi Ramën, për Kosovën është mashtruese. Po ta kisha provuar do kishte dalë keq për Kosovën. Ata nuk humbin, por edhe nuk fitojnë. Unë e kam thënë disa herë ne jemi vëllezër shqiptarë, unë nuk kam vlerësime të cfarëdo natyre për individin ç’ka thotë ai."