Një aksident i rëndë ndodhi pasditen e sotme në aksin rrugor Korçë-Pogradec, ku dy automjete u përplasën kokë më kokë në afërsi të Maliqit.
Si pasojë e përplasjes së fortë kanë mbetur të plagosur 5 persona, dy drejtuesit e mjeteve dhe tre pasagjerët, mes tyre edhe një vogëlushe 8-vjeçare.
Të lënduarit janë transportuar në Spitalin e Korçës, ku ndodhen nën kujdesin e mjekëve.
Siç shihet dhe në pamjet e dërguara në redaksinë e JOQ Albania, në aksident janë përfshirë dy automjete, një "Golf" dhe një "Benz", të cilat kanë marrë dëmtime të mëdha në pjesën e përparme.
Sipas një dëshmie të mbërritur në redaksinë e JOQ Albania, ambulanca u vonua.
Njoftimi i policisë:
Më datë 30.12.2019, në aksin rrugor Korçë-Pogradec, në hyrje të Maliqit, janë përplasur mjeti tip “Benz” me drejtuese shtetasen E.B., dhe mjeti tip “Golf” me drejtues shtetasin Gj.M, rreth 26 vjeç.
Për pasojë janë dëmtuar 2 drejtuesit e mjeteve dhe 3 pasagjere, konkretisht shtetaset E.T., D.T., të dyja pasagjere në mjetin tip “Golf” dhe shtetasja L.Sh, pasagjere në mjetin tip “Benz”, të cilët ndodhen në Spitalin e Korçës, nën kujdesin e mjekëve.
Grupi hetimor po punon për të zbardhur rrethanat e ngjarjes dhe për të përcaktuar shkaqet e aksidentit.