Fakti që Kosova nuk është pranuar në Eurovizion, kjo nuk do të thotë se një kosovar s'mund të ngjitet në skenën e këtij kompeticioni ndërkombëtar muzikor.
Përveç Arilena Arës, e cila do të përfaqësojë Shqipërinë, duket se edhe një shqiptar i Kosovës me shumë gjasa mund të përfaqësojë Kroacinë në festivalin europian.
Ai ka hyrë në garën e ngushtë të këngëtarëve që të marrin pjesë në festivalin kombëtar "Dora 2020".
Bëhet fjalë për talentin 17-vjeçar, Edi Abazi, i cili është pjesë e 16 artistëve më të mirë kroat që do të garojnë për të përfaqësuar vendin e tyre në Eurovizion.
Adoleshenti është rritur në Kroaci, ndërsa prejardhja e tij shqiptare lidhet me babain e tij, i cili është nga Kosova.
Në një prononcim të shkurt për 'Zëri.info', Edi ka treguar se është me prejardhje shqiptare, duke treguar se babai i tij është nga Kosova.
Në “Dora 2020”, talenti kosovar do të garojë me këngën “Coming Home”, ndërsa festivali do të mbahet më 29 shkurt në Kroaci.
Ajo që vlen për t'u theksuar është se Edi është vlerësuar nga profesionistët, si një nga emrat më premtues të muzikës në Kroaci.
