I moshuari që sfidon të rinjtë/ Njihuni 83-vjeçarin shqiptar, kampion të Ballkanit në vrapim

Nexhat Xhemalçe, mund të cilësohet pa dyshim si i moshuari shqiptar që ka thyer çdo limit të moshës së tij, duke sfiduar hapur edhe brezin e ri.

E themi këtë pasi ai është shpallur kampion i Ballkanit në moshën 83-vjeçari.

Në një intervistë për "Abc News", ai rrëfeu si u shpall kampion në dy garat, në 5000 metra dhe në një gjysmë maratone, gjatë kampionatit ballkanik që u zhvillua shtatorin e vitit 2018.

83-vjeçari u shpall kampion edhe kampionatin ballkanik të këtij viti, që u zhvillua në Bukuresht të Rumanisë, ku mori pjesë në dy gara, në 5000 metra edhe në gjysmë maratonë, ku thekson se bëhej fjalë për 21 km e 97 metra.

Sporti shqiptar, i cili dikur ka qenë mësues, tregoi se kur ishte në prag të pensionit, nisi vrapin për t'i dhënë kuptim jetës së tij.

Ai tregon se ka rreth 30 vjet që merret me aktivitet sportiv, ku gjatë këtyre viteve ka marrë pjesë në një sërë aktivitetesh sportive, jo vetëm të rangut kombëtar, por edhe atij ndërkombëtar.

I moshuari që s'njeh moshë rrëfen:

“Kam gati 30 vjet që merrem me aktivitet sportiv. E kam filluar pothuajse në moshë të madhe. Kam qenë arsimtar dhe në pension kam dalë në moshën 55 vjeç. Gjatë këtyre 30 viteve kam një gamë të madhe aktivitetesh sportive, qofshin të rangut kombëtar, qofshin të rangut ndërkombëtar. Në këto disiplina gjithnjë do merren garat e thellësisë, bëhet fjalë për maratona dhe gjysmë-maratona. Vjet, në muajin shtator mora pjesë në kampionatin ballkanik që u zhvillua në Slloveni. Mora pjesa në dy gara, në 5000 metra dhe në gjysmë-maratone. Në këto dy gara dola kampion Ballkani. Sivjet mora pjesë në kampionatin ballkanik që u zhvillua në Bukuresht, në Rumani. Edhe aty mora pjesë në dy gara, dola kampion Ballkani, si në 5000 metra edhe në gjysmë-maratonë. Bëhet fjalë për 21 km e 97 metra."