I sëmurë me diabet e me zemër, flet familjari i strehuar në hotel: S’kam pirë ilaçet se jam në grevë, na sollën 30 mijë lekë bonus qiraje

Thumana ishte ndër zonat më të prekura nga tërmeti i fuqishëm i 26 nëntorit, ku si pasojë e shembjes së dy pallateve të vjetër humbën jetën tragjikisht 24 persona.

Po ashtu, në këtë zonë, e cila ishte vetëm pak kilometra larg epiqendrës së tërmetit, u shkatërruan dhjetëra ndërtesa, duke lënë qindra banorë pa një strehë.

Një nga banorët e prekur në Thumanë është edhe Besnik Greku, i afërm i tre pjesëtarëve të familjes Greku që humbën jetën nga tërmeti.

Besniku ndodhet i akomoduar në një hotel në Shëngjin, por pavarësisht se ka probleme me shëndetin, ai ka marrë vendimin për t'u futur në grevë urie, pas vendimit të qeverisë për boshatisjen e hoteleve nga banorët e prekur nga tërmeti deri në datën 3 janar.

Në një video të publikuar nga ish-kryeministri Sali Berisha në "Facebook", ai tregon se i kanë ofruar një bonus qiraje deri në 30 mijë lekë.

Sipas tij, kjo shumë qesharake nuk i mjafton për të gjetur një shtëpi për veten dhe tre anëtarët e tjerë të familjes së tij.

Ai shprehet:

Unë quhem Besnik Greku nga Thumana, jam i sëmurë me diabet me zemër, jam futur në grevë urie se nuk po na jep rrugëzgjidhje shteti, i bëj thirrje shtetit të ndihmojë njerëzit në nevojë sidomos ata të Thumanës. Jam i sëmurë, nuk kam pirë sot ilaçet se jam në grevë urie. Na sjellin një bonus me 20 mij lekë a 30 mijë lekë po s’kam ku e gjej shtëpinë me kaq lekë. Nuk bëhet fjalë, grevë urie deri në fund."

Kujtojmë këtu se banorët e prekur nga tërmeti në Thumanë kanë vendosur të hyjnë në grevë urie, duke iu përgjigjur kështu vendimit të paprecedentë të qeverisë, për t'i braktisur ata.