Qeveria ka vendosur që të lërë në rrugë të madhe qytetarët e prekur nga tërmeti shkatërrues i 26 nëntorit.
Banorëve të prekur nga tërmeti u është kërkuar që të dalin nga hotelet ku janë akomoduar deri më 3 janar 2020.
Ka qenë zv.ministrja e Brendshme, Rovena Voda, që njoftoi vendimin e paprecedentë të qeverisë për të nxjerrë nga hotelet të gjithë qytetarët që tërmeti i la pa një strehë, në emisionin "Kjo Javë" në News24.
Ajo e justifikoi këtë vendim të qeverisë, duke u shprehur se hotelet duket të lirohen, në mënyrë që të bëhen gati për sezonin turistik.
Zv.ministrja tha:
Akomodimi ishte sfida më e madhe. Pasi u mbyll faza e kërkim shpëtimit, akomodimi ishte sfida më e madhe në afatshkurtër ne e zgjidhëm duke ofruar këtë standard në hotele, ku është marrë edhe ushqim. Sigurisht që hotelet do të duhet të përgatiten, sepse fillon sezoni turistik ne ja kemi bërë të qartë, kemi qenë transparent me qytetarët e akomoduar në hotele, duke thënë që edhe Vitin e Ri do ta kalojnë në hotele, dhe me datat 3 maksimumi deri me 5 janar hotelet do të duhet të boshatisen, pasi do të fillojnë përgatitjen për sezonin turistik. Ajo çfarë kemi sqaruar dhe po vazhdojmë të punojmë me punonjës të bashkisë Durrës, të paktën flas për qarkun Durrës kemi shkuar në këto hotele dhe po përpiqemi të sqarojmë qytetarët që të vijnë dhe të aplikojnë për bonus qiraje."
Tashmë, pas pabesisë nga natyra që u shkatërroi banesat dhe i la pa një strehë mbi kokë, banorët duhet të përballen edhe me braktisjen nga qeveria.
