Producenti me origjinë nga Kosova, Flamur "Alex" Beqiri u qëllua me një breshëri plumbash ditën e Krishtlindjeve, e për pasojë mbeti i vdekur në Londër. Mësohet se shqiptarit nga Kosova, iu bë atentat në sy të djalit dhe të gruas së tij.
Mediat e huaja bëjnë me dije se ai ishte vëllai i modeles së njohur, Misse Beqiri.
Ai u vra me armë zjarri në Battersea gjatë rrugës për në shtëpi rreth orës nëntë të darkës.
Ekzekutimi i tij ka tronditur Londrën, ndërkohë që mediat britanike, pas një investigimi me mediat suedeze, kanë zbuluar të kaluarën e errët të 36-vjeçarit.
Raportohet se Beqiri ka qenë i lidhur me disa vrasje mes shqiptarëve në Suedi, gjatë kohës që ai jetonte atje. I rritur mes Kosovës e Shqipërisë, ai emigroi kur ishte ende fëmijë në Suedi. Aty u lidh me mafien e nëntokës suedeze, dhe në vitin 2008 u procedua për futjen e një sasie kokaine me vlerë 2 milionë dollarë në Skandinavi.
Para se të transferohej në Britaninë e Madhe tre vjet më parë, disa nga miqtë dhe bashkëpunëtorët e tij të ngushtë në Suedi u vranë.
Daily Mail shkruan se ai ishte shpallur si personi më i kërkuar në Suedi, ndërkohë që nuk u mor vesh si arriti të mos arrestohej dhe për më tepër, të transferohej në Britani.
Beqiri njihej për jetën luksoze, madje kishte blerë një super shtëpi për 1.5 milionë euro. Ai u martua në vitin 2018 me bashkëshorten e tij Debora Krasniqi, në liqenin e pasanikëve në Itali, Como, në një ceremoni super luksoze, me të ftuar nga disa vende të botës. Me Deboran u njoh gjatë martesës së të motrës, e cila është një yll dhe personazh i njohur në Britani.
Gjatë një interviste për një revistë britanike, Deborah kishte rrëfyer njohjen me të shoqin, i cili e mori në telefon dhe folën për disa orë pa shkëputje, dhe më pas u takuan. Policia thotë se për momentin nuk ka ende asnjë të dyshuar për vrasjen e 36-vjeçarit, i cili u ekzekutua ndërsa kthehej në shtëpi bashkë me të shoqen dhe fëmijën e vet.