Kryebashkiaku i Tiranës, Erion Veliaj ka theksuar sërish se do ta shembë godinën e Teatrit Kombëtar.
Mirëpo, Aleanca për Mbrojtjen e Teatrit reagoi menjëherë në lidhje me këtë ngjarje, duke theksuar se Veliaj do vetëm të legjitimojë grabitjen e planifikuar të pasurisë kombëtare.
Gjithashtu një reagim ka ardhur edhe nga ish-deputetja Albana Vokshi, e cila shkruan se kryebashkiaku nuk ka asnjë projekt zhvillimi, veç atyre korruptive që betonizojnë kryeqytetin.
Sa i takon shembjes së godinës së Teatrit Kombëtar, Vokshi shkruan plot ironi se ajo që mund të bëjë Erion Veliaj, është të lyejë me gëlqere ndonjë shkallë.
Postimi i Vokshit:
Kryetari ilegjitim i Bashkisë së Tiranës, i cili mban të uzurpuar qytetin me një grusht votash, nuk ka asnjë projekt zhvillimi, veç projekteve korruptive që betonizojnë kryqytetin.
Është viti i pestë i drejtimit të Tiranës prej tij dhe vazhdon të mburret, pa u skuqur fare, me projektet madhore të Lulzim Bashës, Bulevardin e Ri, Pazarin e Ri, lumin e Tiranës.
Oferta e Veliajt nuk është zhvillimi, por shkatërrim i gjelbërimit, shkatërrim i historisë së qytetit nëpërmjet lejeve të ndërtimit, ku pastron paratë krimi i organizuar në lidhje me pushtetin.
Teatri Kombëtar është njëri nga këto projekte korruptive, me fitues të paracaktuar Fusha shpk, të cilit Erion Veliaj dhe Edi Rama i kanë dhënë mbi 100 milionë euro tendera.
Ajo që mund të bëjë Erion Veliaj, është të lyejë me gëlqere ndonjë shkallë, po Teatrin ta harrojë! Atë që nuk prishi dot tërmeti i natyrës, nuk ka për ta prishur tërmeti i korrupsionit i Edi Ramës dhe Erion Veliajt!