Familja Lushi nuk gëzon dot në këto festa të fundvitit, kjo si pasojë e kushteve ekstreme në të cilat jetojnë dhe jo vetëm.
Ata banojnë në fshatin Poloskë të Devollit, konkretisht në një kasolle të improvizuar, ku me pak fjalë mund të themi se ata po qëndrojnë në mes të katër rrugëve.
Mirëpo historia e tyre nuk përfundon me kaq, pasi në jetën e tyre gjendet dhimbje dhe lot.
'Abc News' pasqyron historinë e tyre, u tregon se dy muaj më parë ata jetonin në banesën që e kishin ndërtuar me mund dhe sakrificë. Teksa u hodhën në rrugë nga vet familjaret e Albanit, kryefamiljarit Lushi. Një testament i padrejtë i la ata pa strehë. Motra e kryefamiljarit në mënyrë të pamëshirshme iu mori gjithçka ndërsa nuk e prekën as lutjet e dy fëmijëve të cilët nuk rreshtin së derdhur lot. Adriana e mbytur nga dhimbja rrëfen gjithçka ka ndodhur dhe si përfunduan në kasollen e ndërtuar për tu strehuar edhe pse e mbuluar me plasmas, temperaturat e ulta janë të padurueshme.
“Për banesën ka kontribuar burri me kunatin”, shprehet ajo.
Drita e vetme për ta është një llambë e improvizuar në kushte primitive teksa tualeti nuk ekziston. Vakti ushqimor është trahanaja e siguruar nga të afërmit e Adrianës.
Kryefamiljari punon çoban në mal për të siguruar sado pak të ardhura për të mbajtur familjen. Padrejtësitë e bëra nga familja e tij e kanë rënduar psikologjikisht i cili shpesh herë ka tentuar edhe vetëvrasje. Ai nuk e kapërdin dot faktin se djersën e një jetë ia rrëmbyen ndërsa fëmijët e tij kanë mbetur në qiell të hapur.
E mbytur në lot dhe dhimbje, Adriana thotë se nuk ka mundësi të festojë edhe pse krishtlindjet janë të shenjta për të. Apeli është për ndihmë për të gjithë ata që kanë mundësi.
“Nuk mendoj për vete vetëm për dy fëmijët”, shprehet Adriana.
Ndërkohë Renaldi është vetëm 14 vjeç por kupton çdo padrejtësi qe i është bërë familjes së tij. Mes lotësh ai apelon.
“Qëkur kemi dalë këtu nuk e lexoj dot mirë librin është shumë errësirë”, thotë Renaldi.
Në një moshë më të rritur Denisa thotë se mungesa e energjisë bën që ta ketë të pamundur leximin çka ka bërë edhe të bjerë në rezultate në mësime ku prej kohësh ka qene nxënëse ekselence.
“Shumë e vështirë për të mësuar”, shprehet vajza.
Një muaj më parë përmbarimi nxori forcërisht familjen me 4 anëtarë . Vëmendja e bashkisë është zero. Kasollja u ngrit pak metra larg banesës ku ata jetonin. Siç shihet edhe në pamje banesa aktualisht është bosh. Ndërsa familja Lushi fle në kasolle.
Jo më shumë se 5 metra ndodhen motra dhe prindërit e Albanit të cilët i hodhën më rrugë pa mëshirë. Ndonëse shohin kushtet ku ata jetojnë , dhembshuria është pothuajse zero.
