Lutja e aktorit të njohur për Krishtlindjen: O Zot, shpëtoje Shqipërinë nga gomerët që e qeverisin!

Aktori i njohur, Gent Bejko, ka bërë një deklaratë të fortë mbrëmjen që lamë pas.

I ftuar në emisionin "Soiree", Bejko bëri një lutje në natën e Krishtlindjes, ku shprehu dëshirat që do donte t'i plotësoheshin vitin që po vjen.

Në lutjen e tij, ish-aktori i Portokallisë i drejtohet Zotit duke i kërkuar që ta shpëtojë Shqipërinë nga politikanët që kanë qeverisur që nga viti '45, të cilët i cilëson si "gomerë".

Ai u shpreh:

O Zot, unë jam mirë me familjen time me njerëzit e mi, por shpëtoje Shqipërinë nga gomerët që e qeverisin që nga viti ’45. Ka një shprehje që thotë ‘I zoti e nxjerr gomarin nga balta’ dhe shpresoj që populli im ta kuptojë që duhet ta nxjerri vetë gomarin nga balta dhe të mos durojë më gomerët që e qeverisin që nga ’45."

Teksa moderatorja e pyeti nëse ka shpresë se një lutje e tillë do i plotësohet, aktori tha se shqiptarët nuk janë aspak një popull dele, apo që mund t'i tërheqësh prej hunde, por thjesht kanë nevojë të jenë pak më të guximshëm.

Ai shtoi:

Po kam shpresë, sidomos tashmë që jetoj jashtë, shikoj që ne nuk jemi aspak një popull dele, nuk jemi një popull që mund të na tërheqësh kollaj prej hunde. Thjesht kemi nevojë që të jemi pak më të guximshëm."