Ismet Shetaj është një ndër të prekurit nga tërmeti, të cilit banesa iu dëmtua që më 21 shtator.
Ai bën me dije se i kalon netët në çadër me familjen e tij, të cilët janë plot 11 anëtarë, mes tyre edhe katër nipërit e mitur.
Banesa e tij e dëmtuar ndodhet në fshatin Shetaj të Durrësit, i cili pasi nuk gjeti asnjë përgjigje nga institucionet, ka nisur të riparojë vetë dëmet.
Mirëpo, qeveria në vend ta ndihmojë, i ka vendosur Shetajt një gjobë prej 5 milionë lekësh të vjetra.
Ismeti rrëfen për Syri Tv se, banesa e ndërtuar që në vitin 1985 iu dëmtua që prej tërmetit të 21 shtatorit, e përmes një dokumenti kreu i njësisë administrative deklaronte se banesa duhej riparuar. Tullat e lidhura me baltë dhe banesa pa kolona rrezikonte jetën e familjes Shetaj…
Në kushtet kur askush nuk mori përsipër riparimin e banesës, Ismeti nisi të ndërhyjë përmes ndërtimit të kolonave, për të bërë shtëpi më të sigurtë për familjen e tij. Por kjo i solli problemin e radhës, gjobën pesë milionë lekëshe dhe një urdhër gjykate se shtëpia duhet të shembet. Por, gjoba ka ardhur në emrin e djalit të tij Florjanit….
Tërmeti i 26 nëntorit e bëri edhe më të keqe situatën për 12 anëtarët e familjes Shetaj. Ata deklarojnë se janë të harruar nga shteti, e se jetojnë me shumë vështirësi në çadër, në këto ditë të ftohta dimri. Ismeti pretendon se e gjitha është një hakmarrje personale e inspektorit të zonës së INUK, Ardian Halili. Ndërsa shprehet i vendosur në ndërtimin e shtëpisë, edhe nëse I duhet të përfundojë në burg…
Ismet Shetaj apelon për ndihmë pasi kushtet financiare të kësaj familjeje janë tepër të këqija, çka ja vështirëson përfundimin e shpejtë të banesës.
