Banorët e Sukthit lihen në mëshirë të fatit pas tërmetit: Kemi mbetur si zogu në ferrë, po flemë nëpër plastmase

Sukthi është një nga zonat më të prekura nga tërmeti i 26 nëntorit, ku të shumta kanë qenë shtëpitë e dëmtuara, të cilat janë shpallur të pabanueshme pas kqyrjes nga ekspertët.

Për të kaluar situatën e vështirë pas dëmtimit të banesave, banorët janë detyruar të sajojnë kushte primitive, duke përdorur mushama e plastmase për t'u strehuar.

Ata shprehen se shteti i ka braktisur dhe se nuk kanë marrë asnjë ndihmë. Ndonëse kanë apeluar për ndihmë në Njësinë Administrative dhe Bashkinë e Durrësit, atyre nuk iu është dhënë asnjë përgjigje.

Një nga banorët shprehet për "Fax News":

Që nga ajo ditë kemi mbetur jashtë, asnjë ndihmë nuk na ka ardhur nga shteti, vetëm çfarë kemi mundur të bëjmë vetë. Kemi apeluar për ndihmë në njësinë administrative dhe bashkinë e Durrësit por asnjë përgjigje. Nuk i kemi llogaritur fare festat, kështu siç jemi nuk ka festa për neve."

Një e moshuar shprehet se po jetojnë ditët më të vështira, teksa u shpreh se po jetojnë nëpër plastmase.

Ajo tha:

Kemi mbetur si zogu në ferrë, në plastmasë, më kohë e vështiirë nuk bëhet më. Festat nuk I kemi menduar fare. Nuk na kanë thënë për të shkuar në hotel."

Një tjetër banor tha:

Nuk mund ta braktisim shtëpinë dhe materialet, hotelin mund ta kenë ofruar si opsion, por mund të të thonë të shkosh në Kosovë, por çfarë të bëjmë, të braktisim shtëpinë? Është e lehtë për të ikur."

Ndërsa një banor tjetër tregoi se kishte mbetur bashkë me 12 familjarët në qiell të hapur dhe se do të festojë Vitin e Ri aty nën çadër, pasi nuk ka asnjë zgjidhje tjetër, për shkak të mungesës së përkrahjes nga shteti.