Deklarata e fortë: Edi Rama, shqiptari më i dashur në Serbi

Pedagogu Klejdi Këlliçi ka bërë një deklaratë të fortë këtë mbrëmje në studion e emisionit "360 Gradë".

Ai u shpreh se i vetmi objektiv që ka arritur Rama përmes "Minishengenit Ballkanik" është fakti se sot është shqiptari i tretë më i dashur në Serbi, pas Esat Pashë Toptanit dhe Rrahman Morinës.

Pedagogu tha:

Nëse ka një objektiv minimal që ka arritur është se zoti Rama mund të jetë shqiptari i tretë më i dashur në Beograd. I pari Esat Pasha, i dyti Rrahman Morina dhe i treti Rama. Nuk është e rëndë sepse ka përballë gjithë opinionin publik që është kundër. Nëse është luajtur me dinamikën shqiptar i mirë dhe shqiptar i keq, Rama sot për Serbinë është shqiptari i mirë. Të shkaktojë kaq ndarje mes shqiptarëve për një çështje…"

Kujtojmë këtu se pak ditë më parë në Tiranë u mbajt takimi dy ditor në kuadër të të ashtuquajturit "Samiti i Minishengenit Ballkanik", ku treshja e liderëve ballkanikë Rama-Vuçiç-Zaev u takuan për herë të tretë, kësaj here në kryeqytetin shqiptar, pas dy takimeve të para të zhvilluara në Beograd e Ohër.

Ardhja e Vuçiç në Tiranë shkaktoi reagime të ashpra në mbarë opinionin publik, si dhe u zhvilluan dy protesta para ambienteve ku po zhvillohej takimi tre palësh.

Ato që shkaktuan reagimin më të madh ishin deklaratat e Ramës ndaj kryeministrit në largim të Kosovës, Ramush Haradinaj, të cilin e cilësoi si "gënjeshtar të madh" dhe "të paditur klasik", në prani të Vuçiç e Zaev.