“Shteti na ka lënë harresë”, banorët e Vorës paralajmërojnë protesta: Do bllokojmë autostradën Tiranë-Durrës

Përveç 51 viktimave, tërmeti i fuqishëm i 26 nëntorit la pas mijëra ndërtesa të shkatërruara.

Lëkundjet e fuqishme shkaktuan dëmtime të mëdha edhe në zonën e Vorës, ku 15 pallate janë shpallur të pabanueshme, duke lënë pa një strehë në kokë më shumë se 90 familje.

Shumica e banorëve vijojnë të qëndrojnë në çadër, ndërsa pjesa tjetër jetojnë tek të afërmit, ose kanë marrë shtëpi me qira.

Ata shprehen se deri më tani janë lënë harresë nga autoritetet. Një tjetër problem është ai i bonusit të qirasë, i cili mesa duket deri më tani nuk po aplikohet për banorët e prekur nga tërmeti.

Banorët e kësaj zone shprehen:

Po paguajmë qira, bashkia nuk ka thënë gjë për bonusin që flitet 200 veta. Ja ka gjet ndonjëri bashkia apo Belinda Balluku shtëpinë këtyre familjeve që mos ta ndjejnë këtë tërmet që ra, jo. Gjithësecili e ka gjetur vetë. Vetë çdo gjë. Ky është një tërmet i dytë. Shkojmë në bashki dhe ngrenë supet. Jemi as në qiell dhe as në tokë. Nuk e dimë tani do të na japin qira shtëpie, çfarë do të bëhet me pallatin?

Më tej ata tregojnë se nuk kanë mundësi as të lahen dhe për më tepër nuk kanë as ngrohje, ndërsa theksojnë se çdo gjë e sigurojnë vetë.

Për "Ora News", ata thonë:

Në çadër, pa larë. Ngrohje nuk ka, një kalorifer që kishim na e morën se thanë mos digjeni.Tani kemi mbetur në të ftoftë dhe shi. Kemi qenë jashtë shtetit, gjuhën se dinim dhe na ka strehuar greku, që thotë greku greku.Në kishë më ka mbajtur tre muaj me katër fëmijë mua greku.Këta janë pa shpirt, nuk e di çfarë shteti i ndyrë është. Erdha të lë kockat këtu se nuk desha ti lë jashtë shtetit."

Ata bëjnë apel ndaj shtetit që të merren masa për strehimin e tyre, pasi në të kundërt do të zhvillojnë protesta, që do të arrijnë deri në bllokimin e autostradës Tiranë-Durrës.