Partia nacionaliste VMRO-DPMNE, prijëse e ish qeverisjes së kaluar, vazhdon kategorikisht ta hedhë poshtë Marrëveshjen e Prespës. Marrëveshje kjo që i dha Republikës së Maqedonisë së Veriut dritë jeshile për anëtarësim në NATO, dhe ia ndërroi emrin kushtetues shtetit.
Kryetari i VMRO-DPMNE-së Hristian Mickoski në emisionin “Brifing i mëngjesit” deklaroi se me shumicë prej dy të tretave në Parlamentin do ta shfuqizojë Marrëveshjen e Prespës.
“Me shumicë prej dy të tretave në parlament, e shfuqizojmë Marrëveshjen e Prespës”, tha Mickoski për “Brifingun e mëngjesit”.
Nga ana tjetër kryeministri i RMV-së Zoran Zaev në lidhje me deklaratën e Mickovskit ka thënë se mu për këtë arsye, Mickovski nuk do të vijë në pushtet.
“Unë nuk dyshoj se VMRO-DPMNE nëse futet në Qeveri do ta anulojë marrëveshjen, do të bëjnë gjithçka që ta anulojnë marrëveshjen, por njëkohësisht duhet t’u tregojë me nder qytetarëve se kjo do të na kthejë prapa, jashtë prej BE-së dhe NATO-s, të mos flasë se do të na grindin prapë me fqinjët, si do të ndikojë kjo te ekonomia, si do të ndikojë mbi të gjithë rajonin. Nëse një kryeministër, kushdoqoftë, nuk e përdor emrin kushtetues të shtetit Republika e Maqedonisë së Veriut, duhet ta dijë se çfarë pason, edhe ai edhe qytetarët, kjo nënkupton zemërim përmes një vetoje të re, do të jemi përsëri të bllokuar dhe përsëri do të presim 15 vite si kandidatë, duhet të presim që përsëri të vjen dikush e t’i kthejë punën në normalitet”, ka deklaruar Zaev.
