Ish-deputeti i Lëvizjes Socialiste për Integrim, Endrit Braimllari ka reaguar në lidhje me 'Minishengenin Ballkanik', të cilën e konsideron se nxitës konfliktesh.
Gjatë një interviste në Vizion Plus, ai theksoi se Rama dhe rilindja në vend t’i jepnin përgjigjen e merituar Vuçiçit për masakrën e Reçakut, sulmuan liderët e Kosovës.
Gjithashtu, Braimllari nënvizoi faktin se veprimet e Ramës janë anti-kombëtare dhe aspak në shërbim të vendin dhe rajonit.
Së fundmi, ish-deputeti theksoi se përpjekje të tilla shkojnë kundër interesave të BE-së dhe SHBA-së.
Braimllari tha:
Mini shengeni Ballkanik pa Kosovën dhe vendet e tjera të Ballkanit Perëndimor është një sipërmarrje e gabuar e cila nxit konflikt. Është e pafalshme nga ana e qeverisë shqiptare dhe kryeministrit që nuk është konsultuar me qeverinë e Kosovës për këtë sipërmarrje e cila në këto kushte rëndon drejtpërdrejt mbi interesin e Kosovës. Veprimet e kryeministrit janë anti-kombëtare dhe aspak në shërbim të një kauze e cila sjell mirëqenie ekonomike dhe stabilitet për vendin por dhe për rajonin sepse ky takim është bërë në kushtet e mungesës së transparencës. Sidomos pas komunikimit të Vuçiç për ta quajtur trillim dhe duke fyer viktimat e pafajshme të masakrës së Reçakut, Edi Rama qeveria Shqiptare sot duhet t’i kishin dhënë përgjigjen e merituar duke mos e zhvilluar një takim të tillë në Shqipëri. Përpjekje të tilla të cilat nuk kanë të bëjnë me stabilitetin e vendit dhe të rajonit sepse po të ishte ndryshe në tavolinë do ishte dhe Kosova dhe vendet e tjera të Ballkanit Perëndimor shkon kundër interesave të Bashkimit Europian dhe të partnerit tonë strategjik Shteteve të Bashkuara të Amerikës.
