Gazetari Mentor Kikia ka komentuar bllokimin për disa orë të Rrugës së Kombit si pasojë e reshjeve të dendura të borës. Gjatë këtyre ditëve, ka pasur edhe aksidente në këtë rrugë.
Në një reagim në rrjetet sociale, gazetari thekson se sot kjo marrëveshje koncesionare u dëshmua si forma më e keqe. Rruga u bllokua për shkak të mungesës së mirëmbajtjes, ndonëse u vendos taksë prej 5 euro për mjetet e vogla për çdo kalim të traut.
Reagimi i plotë i Mentor Kikisë:
Kjo është fytyra e konçensionarëve që kanë marrë tërë shtetin në mirëmbajtje.
Rruga e Kombit do të duhej të ishte një test për të treguar se sa e leverdishme është dhënia me konçension e mirëmbajtjes së rrugëve kompanive private. Dhe u dëshmua që është forma më e keqe e mundshme.
Me 5 cm borë, autostrada u bllokua disa herë, dhjetëra makina janë aksidentuar, duke u përplasur mes tyre e me parmakët mbrojtjes, duke pësuar dëmtime. Dëshmitë e qindra qytetarëve që kanë mbetur të bllokuar në segmente të ndryshme tregojnë se nuk ka asnjë lëvizje nga ana e kompanisë mirëmbajtëse.
Ky nuk është një dështim vetëm i këtij projekti. Por është dëshmi se marrëveshjet koncensionare me klientët e babëzitur qeveritarë janë vetëm forma zhvatjeje në kurriz të qytetarëve.
Ai tra atje para tunelit sot duhet të ngrihet. Të paktën sot. Nuk ka asnjë të drejtë ligjore e morale që ajo kompani sot tu marrë para qytetarëve që kalojnë tërë mundim në atë rrugë.
Ndërsa shteti duhet ta menaxhojë vetë tarifën. Qytetarët nuk refuzuan të paguajnë tarifën e rrugës, por në raste të tilla të jetë dikush që të hedhë një dorë kripë."