E shkuara e errët e ‘Titit’ që u plagos me armë nga policia greke

Detaje të reja vijojnë të dalin nga plagosja e shqiptarit Alesio Xhelo, i njohur edhe me nofkën “Titi”, gjatë një përplasjeje me policinë greke. Sipas mediave dhe autoriteteve greke, ai konsiderohet si një person me precedentë të rëndë penalë dhe i dyshuar për përfshirje në aktivitete kriminale të organizuara, përfshirë grabitje dhe sulme të armatosura në disa vende të rajonit.

Autoritetet greke e kanë përshkruar 42-vjeçarin si një person të rrezikshëm dhe të përfshirë prej vitesh në veprimtari kriminale, me një histori që përfshin përplasje të armatosura me policinë dhe vepra të rënda penale. Sipas tyre, emri i tij është lidhur me disa ngjarje të dhunshme ndër vite, ndërsa ai rezulton i dënuar në mungesë dhe i kërkuar për ekzekutimin e një dënimi të gjatë burgimi.

Në zhvillimet më të fundit, autoritetet greke bëjnë me dije se Xhelo është plagosur gjatë një operacioni policor dhe i janë gjetur armë dhe mjete shpërthyese. Ngjarja ka rikthyer vëmendjen e autoriteteve mbi aktivitetin e tij të mëparshëm dhe mbi lëvizjet e tij në rajon, ndërsa hetimet për rrjetin e mundshëm të bashkëpunëtorëve vijojnë.