Një 24-vjeçar shqiptar, i identifikuar si Albjon Metlekaj, është dënuar me katër vite burg nga Gjykata e Lartë e Cambridge (Cambridge Crown Court) më 31 tetor 2025, pasi u shpall fajtor për posedim me qëllim shpërndarjeje të drogës së klasës A, drejtim të rrezikshëm të automjetit dhe arratisje nga kujdesi ligjor. Gjithashtu, atij i është ndaluar drejtimi i makinës për tre vite e nëntë muaj.
Sipas policisë së Suffolk, ngjarja ndodhi më 5 korrik 2025, kur oficerët e Sentinel West Team lokalizuan një Audi A7 të zezë të dyshuar për përfshirje në shpërndarjen e drogës. Metlekaj refuzoi të ndalonte dhe nisi një arratisje të rrezikshme, gjatë së cilës u përplas me një automjet tjetër, duke shkaktuar dëme të lehta dhe rrezikoi jetën e një këmbësori.
Gjatë ndjekjes, nga makina u hodh një çantë, e cila më vonë u gjet dhe përmbante rreth 250 qese me kokainë, me vlerë rreth 12,500 paund. Analizat forenzike e lidhën direkt Metlekajn me drogën.
Pas arrestimit, ai u arratis nga spitali ku po merrte trajtim mjekësor, por u kap tetë orë më vonë pas një operacioni të gjerë kërkimi.
Oficeri PC Mike Spurling u shpreh se “ishte vetëm fati që askush nuk u lëndua nga drejtimi i tij i rrezikshëm” dhe theksoi rëndësinë e largimit të substancave të tilla nga rrugët e Suffolk-ut.
