Dhjetë persona ndodhen në spital, nëntë prej tyre në gjendje kritike për jetën, pas një sulmi me thikë që ndodhi të shtunën në trenin e linjës 18:25 Doncaster drejt London King’s Cross, Angli.
Policia mori telefonata urgjente nga pasagjerët rreth orës 19:40, të cilët raportuan për incidentin në bord. Treni bëri më pas një ndalesë të paplanifikuar në Huntingdon, Cambridgeshire, ku forcat e armatosura dhe shërbimet e emergjencës mbërritën menjëherë në platformë.
Rreth orës 21:45, kryebashkiaku i Cambridgeshire njoftoi se dy persona ishin arrestuar dhe ndodheshin në paraburgim, lajm që më vonë u konfirmua edhe nga policia lokale.
Në hetim tashmë është përfshirë edhe njësia kundër terrorizmit, ndërsa oficerët po përpiqen të kuptojnë çfarë ndodhi dhe cili ishte motivi i sulmit.
Ajo që ende nuk dihet është identitetet i 10 personave të plagosur, detajet për dy të arrestuarit dhe motivi që çoi në këtë ngjarje të rëndë.
