Një gjykatë në Republikën Domenikane ka dënuar me 15 vite burgim shtetasin shqiptar Sejdin Kote, i shpallur fajtor për trafik ndërkombëtar të lëndëve narkotike. Vendimi u dha pasi në nëntor të vitit 2024, ai u kap në Aeroportin Ndërkombëtar “Las Américas” duke tentuar të udhëtonte drejt Madridit me 40 pako kokainë, me peshë totale 39.13 kilogramë.
Dënimi u shpall nga Gjykata e Parë Kolegjiale e Santo Domingo Este, pas kërkesës së Prokurorisë, përfaqësuar nga prokurorët Evelyn Peña dhe Alexis Casado, të cilët paraqitën prova të mjaftueshme që vërtetuan fajësinë e të pandehurit.
Sipas aktakuzës së përgatitur nga prokurori hetues César Augusto Veloz, droga u zbulua më 16 nëntor 2024, gjatë kontrollit me rreze X në bagazhet e pasagjerit shqiptar. Oficerët e CICC–DNCD konstatuan imazhe të dyshimta dhe, pas inspektimit fizik, gjetën substancën narkotike të ndarë në dy grupe.
Trupi gjykues, i përbërë nga gjyqtarët Elizabeth Esperanza Rodríguez Espinal, Flor E. Batista Polo dhe José Leonel Asencio Quezada, vendosi që Sejdin Kote të vuajë dënimin në Qendrën e Korrektimit dhe Rehabilitimit “Najayo Hombres”, në provincën San Cristóbal.
