Fshati piktoresk i Linit është shpallur “Ansambël Arkitektonik Urban” dhe tani bën pjesë në zonën shqiptare të Trashëgimisë Botërore të UNESCO-s, si pjesë e “Trashëgimisë Natyrore dhe Kulturore të Rajonit të Ohrit”. Ky status vlerëson peizazhin unik të fshatit, ku ndërthuren në mënyrë harmonike trashëgimia kulturore dhe ajo natyrore.
Fshati ruan strukturën tradicionale urbanistike me rrugica karakteristike prej kalldrëmi dhe lagje të ngushta, ndërsa arkitektura vernakulare përdor teknika dhe materiale vendase, të përshtatura mjeshtërisht me klimën dhe resurset lokale.
Kjo i jep Linit një identitet të veçantë dhe e dallon nga fshatrat e tjerë të rajonit. Kjo njohje e re e Linit e bën atë një destinacion tërheqës për vizitorët dhe përforcon rëndësinë e ruajtjes së trashëgimisë së tij natyrore dhe kulturore, duke siguruar që bukuria dhe traditat e fshatit të mbeten të paprekura për brezat e ardhshëm.
