Punonjësi i karburantit pranë të cilit u vranë dy të rinjtë Flori Paluçi dhe Aranit Kurti ka rrëfyer për mediat momentet e para pas ngjarjes së rëndë. Ai tha se kur shkoi në punë në mëngjes gjeti karburantin të rrethuar si skenë krimi dhe se djemtë i kishte njohur si persona të sjellshëm, pa konflikte të mëparshme.
“Unë erdha në mëngjes, gjeta karburantin e rrethuar, si skenë krimi. Më thanë ka ndodhur në ngjarje. Njëri nga Manza por nuk rri këtu. Ishin çuna të sjellshëm.”, u shpreh punonjësi i karburantit.
Nga ana tjetër, banorët e zonës janë tronditur thellë nga ngjarja. Një prej tyre shprehet se Aranit Kurti, viktima e parë, ishte kushëri i tij dhe nuk kuptojnë se përse ndodhi kjo tragjedi, duke theksuar se ngjarja i ka lënë të gjithë në gjendje tronditjeje dhe paqartësie.
“Jo nuk dimë gjë. Na ka tronditur rëndë por ndodhi. Nuk di gjë pse ka ndodhur. I njihja, e kam pasur kushëri Aranit Kurtin”, thotë një tjetër banor.
Autoritetet vijojnë hetimet për të zbardhur rrethanat e konfliktit që çoi në vrasjen e dy të rinjve pranë karburantit në Manëz.
