Një 30-vjeçar shqiptar, që punonte në ullishtet e Magnezisë për të mbajtur familjen, është dënuar nga Gjykata e Apelit në Volos për qëndrim të paligjshëm në Greqi.
Sipas mediave greke, i riu kishte mbërritur rreth një vit më parë, duke kërkuar punë për të ndihmuar nënën e tij të sëmurë dhe dy motrat e vëllezërit e vegjël që jetojnë në Shqipëri. Ai punonte me ndershmëri në punë sezonale, por pa dokumente qëndrimi.
Të hënën në mbrëmje, teksa udhëtonte drejt Larisës për të blerë rroba, policia e ndaloi gjatë një kontrolli dhe konstatoi se 30-vjeçari nuk kishte leje qëndrimi.
Në gjykatë, një bashkëpunëtor i tij dëshmoi se i riu kishte tentuar disa herë të rregullonte dokumentet, por ndryshimet e fundit në ligjin grek për emigrantët e kishin penguar.
Gjykata e shpalli fajtor, duke i dhënë 10 muaj burg me kusht dhe urdhër largimi vullnetar nga Greqia.
Një tjetër histori e dhimbshme e një të riu që kërkon të mbijetojë me punë të ndershme, ndërsa ligjet dhe varfëria e ndjekin kudo që shkon.
