Shqipëria po përballet me një krizë të thellë demografike. 43 nga 61 bashki, ose rreth 70% e territorit, kanë pasur shtesë natyrore negative në vitin 2023, sipas të dhënave zyrtare të INSTAT, çka do të thotë se në këto bashki kanë vdekur më shumë persona sesa kanë lindur.
Fenomeni është përkeqësuar edhe më shumë gjatë vitit 2024, për shkak të rënies së lindjeve në shkallë kombëtare, një trend që po shndërrohet në alarm kombëtar.
Më të goditurat janë bashkitë e Jugut, ku plakja e popullsisë dhe emigracioni kanë rritur ndjeshëm numrin e vdekjeve. Korça mban rekordin negativ me -394 banorë, ndjekur nga Vlora (-182), Shkodra (-152) dhe Kuçova (-146). Rënie të theksuara shënojnë edhe Fieri (-128), Lushnja (-124), Maliqi (-101), Pogradeci (-85) dhe Gjirokastra (-74).
Ndërkohë, disa bashki të vogla si Klosi (+4), Divjaka (+9), Saranda (+22) dhe Bulqiza (+47) kanë ruajtur një balancë të lehtë pozitive, falë turizmit dhe normave tradicionale familjare.
Në krahun tjetër, Tirana mbetet e vetmja bashki me rritje të fortë demografike, duke regjistruar +2,880 lindje neto në vitin 2023. Pas saj renditen Kamza (+640), Durrësi (+386), Kruja (+231) dhe Kukësi (+221), që kanë arritur të ruajnë një nivel të moderuar shtese natyrore.
Ky kontrast tregon për një përqendrim gjithnjë e më të madh të popullsisë dhe burimeve në kryeqytet, ndërsa pjesa tjetër e vendit po përjeton një tkurrje të vazhdueshme.
Ekspertët paralajmërojnë se emigracioni i të rinjve po boshatis zonat rurale dhe qytetet e vogla, duke larguar grupmoshat riprodhuese dhe duke përshpejtuar plakjen e popullsisë.
Pasojat janë të rënda: mbyllje shkollash, mungesë e fuqisë punëtore, ulje e konsumit dhe vështirësi në ofrimin e shërbimeve publike. Nëse trendi vijon me këtë ritëm, pjesë të tëra të Shqipërisë rrezikojnë të mbeten pa banorë brenda dy dekadave të ardhshme.
