Avokati Ulian Barjami është liruar nga qelia pasditen e sotme, ku ndodhej i ndaluar që nga dita e shtunë, 18 tetor, pas një incidenti në sallën e gjyqit.
Arrestimi i tij erdhi pas një përplasjeje verbale mes Barjamit dhe prokurorit Gjergji Ceka gjatë një seance gjyqësore, ku avokati mbronte klientin e tij, Maksim Suci.
Gjatë seancës, avokati Barjami kundërshtoi provat e paraqitura nga prokurori, duke i cilësuar si të pasakta. Si pasojë, ai iu drejtua prokurorit duke i deklaruar se do ta ndiqte penalisht për shkelje ligjore. Prokurori Ceka e interpretoi këtë deklaratë si kërcënim për shkak të detyrës dhe bëri menjëherë kallëzim.
Pas kallëzimit, Barjamit iu vendosën prangat nga Oficerët e Policisë Gjyqësore dhe u mbajt në qeli.
Sot, Prokuroria e Elbasanit, pasi mori dhe shqyrtoi materialet e arrestimit të avokatit, e cilësoi veprimin e kryer ndaj tij si të paligjshëm dhe vendosi menjëherë lirimin e tij.
Mbetet për t'u parë nëse avokati Barjami do të ndërmarrë hapa të mëtejshëm ligjorë në lidhje me arrestimin e tij.
