Zgjedhjet lokale në Maqedoninë e Veriut kanë përfunduar me një epërsi të qartë për partinë VMRO – DPMNE e Hristijan Mickoski, e cila ka shënuar një fitore të theksuar duke udhëhequr në 53 komuna, prej të cilave 34 i ka fituar në raundin e parë dhe 19 të tjera i ka siguruar për balotazh. Kjo tregon një rritje të madhe të mbështetjes për këtë subjekt politik, veçanërisht në krahasim me LSDM-në, partinë që deri vonë ishte në pushtet dhe që arriti të fitojë vetëm 3 komuna, duke shkuar në balotazh në 5 të tjera.
Në kampin shqiptar, koalicioni VLEN i Bilal Kasami ka dalë i dyti në renditjen e përgjithshme, duke fituar 5 komuna dhe duke shkuar në balotazh në 4 të tjera, përfshirë Tetovën dhe Bogovinjen, ku do të përballet me kandidatët e koalicionit rival AKI të udhëhequr nga BDI-ja e Ali Ahmetit. AKI ka siguruar 5 komuna që i kryesonte, pa nevojë për balotazh, duke ruajtur bastione të rëndësishme shqiptare si Gostivari, Lipkova dhe Vrapçishta. Shqiptarët nisën festën me tupana, valle dhe këngë tradicionale, duke festuar rezultatet e para me entuziazëm të madh.
