Skandalet ushqimore që mbajnë firmën “Big Market” nuk kanë fund. Nga produkte të skaduara e të mykura, deri te pakot që qarkullojnë me miza brenda, rrjeti i supermarketeve që reklamohen si “më të mirët në treg”, po kthehet në një rrezik të përditshëm për qytetarët.
Rasti më i fundit vjen nga një filial në zonën e Kamzës, ku një qytetar ka blerë një pako makaronash dhe, për habinë e tij, brenda ka gjetur… miza. Një skenë e neveritshme, por fatkeqësisht aspak e rrallë për standardet e Big Market.
Ndërkohë, Autoriteti Kombëtar i Ushqimit, institucioni që duhet të mbrojë qytetarët, hesht. Drejtori i tij, Manush Kullolli, duket se ka zgjedhur të luajë rolin e “të verbërit me porosi”. Kur bëhet fjalë për Big Market, AKU thjesht mbyll sytë.
A është rastësi kjo heshtje? Apo “kapja” e institucioneve ka arritur deri aty sa të mos preket asnjë biznes i lidhur me pushtetin?
Në një vend ku miza shiten me logon e “marketit të madh” dhe autoritetet bëjnë sikur s’kanë parë asgjë, qytetari shqiptar mbetet sërish viktima e vetme e një sistemi të kalbur – ku ushqimi, shëndeti dhe morali kanë dalë jashtë afatit të skadencës.
