Një ngjarje e rëndë është regjistruar në qendër të Bushatit, ku një konflikt për motive të dobëta ka përfunduar me dhunë fizike. Një 56-vjeçar, Besnik Shkambi, banues në fshatin Mali i Jushit, është arrestuar nga policia pasi dyshohet se ka goditur me kosore 39-vjeçarin Paulin Vela, duke i shkaktuar dëmtime të shumta në kokë dhe në trup.
Ngjarja ka ndodhur në ambientet e një lokali, ku pas një debati verbal, Shkambi ka përdorur mjetin prerës ndaj Velës. Si pasojë e goditjeve, ky i fundit ka pësuar frakturë në krahun e djathtë dhe aktualisht ndodhet nën kujdesin e mjekëve, jashtë rrezikut për jetën. Policia ka sekuestruar kosoren në cilësinë e provës materiale.
Pas marrjes së njoftimit, shërbimet e Komisariatit të Policisë Vau i Dejës kanë ndërhyrë menjëherë dhe kanë bërë të mundur arrestimin në flagrancë të autorit. Materialet procedurale i janë referuar Prokurorisë për veprime të mëtejshme hetimore.
