Gjykata e Posaçme kundër Korrupsionit dhe Krimit të Organizuar (GJKKO) ka caktuar masën e sigurisë “arrest me burg” për Amar Shkëmbin, i cili akuzohet për përfshirje në atentatin e ndodhur më 1 nëntor 2019 ndaj prokurorit Arjan Ndoja. Ai përballet me tre akuza të rënda: “Vrasja e funksionarëve publikë”, mbetur në tentativë; “Vrasja në rrethana të tjera cilësuese”, me pasojë vdekjen e Andi Malokut; si dhe “Mbajtja pa leje dhe prodhimi i armëve, armëve shpërthyese dhe i municionit”.
Ngjarja ndodhi në zonën e mbikalimit të Shkozetit në Durrës, kur një makinë tip “Benz” qëlloi në drejtim të automjetit ku ndodheshin prokurori Ndoja, Aleksandër Laho (i njohur edhe si Pëllumb Muharremi), dhe shoferi i tyre Andi Maloku. Ky i fundit mbeti i plagosur rëndë dhe, pavarësisht përpjekjeve të mjekëve, ndërroi jetë dy ditë më pas në Spitalin e Traumës në Tiranë. Hetimet kanë zbuluar se brenda makinës që u përdor për atentatin dyshohet të ketë qenë edhe Redjan Rraja, i cili u arrestua më herët si një nga autorët e dyshuar të sulmit.
Arrestimi i Amar Shkëmbit dhe masat e reja të sigurisë përforcojnë akuzat ndaj një grupi të organizuar kriminal, ndërsa autoritetet po vijojnë hetimet për zbardhjen e plotë të ngjarjes.
