Presidenti amerikan Donald Trump ka tërhequr sërish vëmendjen në skenën ndërkombëtare, pasi gjatë samitit për paqen në Gaza e komplimentoi disa herë kryeministren italiane Giorgia Meloni, duke e quajtur “të bukur”.
Ngjarja ndodhi më 13 tetor në Sharm El-Sheikh të Egjiptit, ku mbi 20 liderë botërorë u mblodhën për të diskutuar konfliktin në Gaza dhe për të nënshkruar “Deklaratën e Trump për Paqe dhe Mirëqenie të Qëndrueshme”.
Teksa mbante fjalën e tij, Trump doli nga tema për të komentuar pamjen e Melonit, duke e shoqëruar me një batutë tipike të stilit të tij: “Ne kemi këtu një grua të re... nuk më lejohet ta them, sepse zakonisht në vendin tim është fundi i karrierës politike nëse e quan një grua të bukur. Por do rrezikoj. Ku është ajo... ja ku është. Nuk të pengon të të quaj të bukur, apo jo? Sepse je.”
Meloni, e vetmja grua mes rreth 30 liderëve në skenë, qëndroi e qetë teksa Trump vijoi ta përgëzonte për suksesin dhe respektin që gëzon në Itali.
Në samit morën pjesë edhe liderë nga Egjipti, Turqia, Katari, Franca, Gjermania, Britania, Jordania dhe Emiratet e Bashkuara Arabe, ndërsa kryeministri izraelit Benjamin Netanyahu mungoi për shkak të festës hebraike Sukkot.
Takimi përkoi me lirimin nga Hamasi të 20 pengjeve izraelite të mbijetuara, ndërsa Izraeli u përgjigj me lirimin e 250 të burgosurve palestinezë dhe mbi 1700 të ndaluarish.
Komentet e Trump, që përzienin shaka dhe politikë, u bënë menjëherë virale, duke rikthyer vëmendjen mbi stilin e tij të veçantë dhe shpesh të papritur në diplomaci.
