Një ngjarje tragjike ka ndodhur në fshatin Kafaraj të Fierit, ku një 81-vjeçar ka humbur jetën pas një aksidenti me biçikletë.
Sipas njoftimit zyrtar nga Policia e Fierit, shtetasi F. T., banues në Kafaraj, dyshohet se ka humbur kontrollin e biçikletës dhe ka rënë në një kanal anës rrugës. Si pasojë e plagëve të marra, i moshuari ka ndërruar jetë.
"Specialistët për Hetimin e Krimeve të Komisariatit të Policisë Fier referuan materialet në Prokurori për vlerësim, pasi shtetasi F. T., 81 vjeç, dyshohet se duke drejtuar biçikletën ka rënë në një kanal dhe për pasojë ka humbur jetën", thuhet në njoftimin e Policisë.
Grupi hetimor po punon për zbardhjen e plotë të rrethanave të ngjarjes.
