Në seancën e sotme gjyqësore ndaj Naim Murselit, Granit Plavës dhe Kushtrim Kokallës, të akuzuar për përfshirje në vrasjen e Liridona Ademajt, po dëshmon Florian Avdija, dëshmitar i propozuar nga Prokuroria.
Avdija është bashkëfshatar i tre të akuzuarve.
Ai ka folur për njohjet me të akuzuarit dhe kontaktet e tyre në kuadër të biznesit të tij familjar.
“Jam pyetur a kam parë Granitin natën kritike, kam thënë që e kam parë në një klub. Granitin në orën 12 të natës”, deklaroi Avdija.
Ai shtoi se ka dorëzuar një video tek autoritetet, të cilën ia kishte dërguar bashkëshortja e tij, Leonora, natën kur ndodhi vrasja.
“Leonora (bashkëshortja) natën kritike ma ka dërguar një video-incizim që e ka marrë edhe policia. U kon Graniti edhe një çikë tjetër”.
Avdija deklaroi se Naim Murseli kishte qenë disa herë në lokalin e tij, ndërsa Granit Plava dhe Kushtrim Kokalla ishin klientë të rregullt.
“Naim Murseli nja 8-10 herë ka qenë në lokalin tim. Kurse Graniti dhe Kushtrimi kanë qenë klientë të rregullt”, vazhdoi ai dëshminë e tij.
