Shqiptarët këtë fundvit po festojnë me buxhet të shtrënguar, duke planifikuar të shpenzojnë kryesisht më pak se 100 euro.
Sipas një sondazhi, shumica e njerëzve do të shpenzojnë mes 50-100 euro, ndërsa një pjesë e vogël do të shpenzojë mbi 500 euro.
Shpenzimet kryesore, siç pritej, shkojnë për ushqime dhe pije, sepse darka tradicionale është e vetmja gjë që nuk e lëmë kurrë pas dore, edhe kur “xhepi qan.” Dhuratat? Pak entuziazëm aty, me shumicën që kanë një buxhet prej 20-50 euro, sa për të treguar se festat nuk vijnë bosh. Për udhëtime? Ah, ato janë për 9.7% fatlumë që ende ëndërrojnë për aventura dimërore.
Për sa i përket dekorimeve, shumica nuk ka shpenzuar fare, duke lënë dritat e vjetra të mbajnë gjallë shpirtin festiv. Në këtë atmosferë të përmbajtur, 93% e shqiptarëve do të mblidhen rreth tryezës, duke ruajtur traditën dhe shpresuar që vitin tjetër, ndoshta, do të kenë disi buxhet më të majmë.
