Mesditën e 25 dhjetorit, një 54-vjeçar në Bathore ka tentuar të djegë familjen e tij me benzinë.
Bashkim Domi 54-vjeç, me benzinën e fshehur nën xhaketë dhe nën efektin e alkoolit, ka kërcënuar se do të digjte me benzinë fëmijët bashkë me bashkëshorten të cilët ndodheshin brenda banesës në momentin që ai i vuri flakën.
Si pasojë e flakëve njëra nga vajzat është djegur bashkë me një pjesë të banesës dhe mobilieve.
Bashkëshortja e tij, tregon tmerrin që ka përjetuar bashkë me fëmijët.
“Unë nuk e dija që kishte benzinë, e kishte future në xhup. E spërkati shtëpinë me benzinë, i thirra fëmijëve të dilnin jashtë. Kur doli jashtë ia hodhi vajzës benzinën te këmbët. Unë dhe djali nuk e di si kemi e kemi ndaluar”-tregon ajo.
Gruaja e tij, e cila është pajisur me urdhër mbrojtje nga gjykata, tregon se ajo prej vitesh ka vuajtur nga dhuna që ushtronte bashkëshorti mbi të dhe fëmijët.
“Gjithmonë ka qenë i dhunshëm qëkur jam martuar. Psikologjikisht dhe fizikisht, në 2017 më ka djegur me tenxheren e fasuleve. E kam denoncuar se më ka lënë për vdekje”.
Pas ngjarjes 54 vjeçari është arrestuar dhe hetimet për këtë ngjarje vijojnë ende.
