Prokuroria e Sarandës ka angazhuar ekspertë psikiatër për të vlerësuar përgjegjësinë ligjore të Elvira Tahirajt, gruas që një ditë më parë vrau bashkëshortin e saj, Llazar Tahiraj, në fshatin Metoq. Autorja e krimit ka shfaqur shenja të paqëndrueshmërisë dhe është trajtuar më parë në spitalin e Sarandës, ku prokuroria ka marrë në dorë kartelën e saj mjekësore. Gjatë marrjes në pyetje, Tahiraj ka pranuar fajin, por ka dhënë versione kontradiktore mbi mënyrën e kryerjes së vrasjes.
Përmes ekspertizës psikiatrike, hetuesit synojnë të përcaktojnë shkencërisht nëse ajo është përgjegjëse ligjërisht për veprimet e saj. Në rast se konkludohet që nuk ka qenë e përgjegjshme, prokuroria do të kërkojë shtrimin e saj të detyrueshëm në një spital psikiatrik. Ndërkohë, Elvira Tahiraj pritet të dalë ditën e nesërme para gjykatës së Sarandës, ku do të vendoset masa e sigurisë nga trupi gjykues.
Çifti Tahiraj jetonte në fshatin Metoq, ku ngjarja e rëndë ndodhi gjatë natës, kur burri i saj ishte në gjumë. Gruaja e goditi atë për vdekje me sëpatë, duke shkaktuar një tragjedi që ka tronditur zonën. Hetimet vazhdojnë për të zbardhur rrethanat dhe motivet e kësaj ngjarjeje të rëndë.
