Shumë akse në veri të vendit janë bllokuar nga dëbora e cila vijon të mospastrohet nga kompanitë kontraktore.
Në aksin Kukës-Bushtricë situata paraqitet problematike pasi ngricat dhe bora i kanë zenë vendin rrugës së shtruar me asfalt.
Edhe në Qafë Mali-Bajram Curri, rruga është e pakalueshme nga dëbora. Por sikur të mos mjaftonte kjo, edhe era e fortë e vështirëson edhe më tepër qarkullimin e mjeteve.
Nga ana tjetër, Rruga e Arbrit për momentin është jashtë funksionit pasi drejtuesit e mjeteve janë detyruar të kthehen nga rruga e vjetër, pasi kanë mbetur të bllokuar me orë të tëra në borë.
Edhe në zonat turistike, Valbonë, Theth, Bogë, situata është problematike dhe kalimi është i mundur me zinxhirë, por me vështirësi.
Përveç këtyre, mungesa e energjisë elektrike e bën edhe më të vështirë situatën pasi edhe në ditë feste, Krishtlindja, shumë zona janë në errësirë totale.
